دجـه طـاش الأولى..في ماكدونالدز

بسم اللـه الرحمن الرحيـم..

ياحيـّا اللـه من جـا..وحيّا اللـه من علق وعبّـر

المكرفون معااااي ..الساحـره تتكلم ..من بدت الدراسـه وأنا نااااويه بس الزوولـه الله لا يذوقكم اياهـا

شفت التعليق sky

الله لا يحرمنـا الخشش اللي زيهـا فدييييتهـا

وقلت خلنـا نتأدب ونكتب دام فيـه أحد يحمس ويشجـع..

أحلى تحيـه لكل من زارنـا وعلق..

واللحيـن ياالربع قررت اقولكم سالفه من دجـات طاش ..وفضايحهم

بصراحـه السالفه كان فيهـا تهوور..لا تفوتكم بسس

ونبلش من طأطأ ..لسلاموو عليكوو..

كيف كانت البدايه..؟ مممممم

كانت ياطويلين العمر السنه اللي فاتت..وبعد ماطفشنا من محاضرات وعملي ولوووعـه كبد

قررنـا ندج..ونووسـع صدورنـا..ومدام مابقى شي على نهايه السنه وهي خاربه خاااربه ..خلينـا نعميها

تم التخطيط قبل السالفه با أسبوع..وقررنا نغيب عن المحاضره الأخيره..اللي هي عباره عن شبكه وكنا نحضر طول الترم عشان نفضى بالأخير للدجات والعزايم>>تخطيط من بدايه الترم:d

وبعدهـا قعدنا نفكر وين نروح؟..وين ندربي برووسنـا..مجمع؟..المشكله عشره ماشاء الله..فضيحه بيشكوون العالم..

مطعم..مممم فكره معقووله..>>هالشله يحبوون البلع:d


طيب أي مطعم..مافيه شي حولنا الا اكلات بحريه.. ووجبـات سريعـه..

مطعم الاكلات البحريه كشخه..بس نصنا مانحب شي بحري!!


وطوووول الاسبوع نفكر..ليله السالفه تمت تداولات وتناقشات على المكان بيني وبين المهايطيه..واستمرت حوالي نص ساعه بدون قرار حاسم..قلنا الصباح رباااااح..نشوف باتسر


وجـا الصبـااااح..وتم لم الشمل بالصاله قبل المحاضره الأولى لوضع النقط على الحرووف..

وبعد نقااااااش حاد..تصرخ باقيرا قائله: شوفوا اليوم بندج بندج حتى لو في بوفيه هنوود..


ويقوووم الضحك..

قلنا خلاص اجل دام السالفه كذا..مابدهااش ياسعيد>>من يطلع سعيد ذا..

مالنـا الا ماكدونالدز أرحم من بوفيه هنود وسندويش بيض:d


ورحنا نحضر بعيون زايغه وعقول خاويـه ماتفكر الا بشي اصفر وأحمر..ويبدأ اسمه بحرفM

=>ينقالهـا لغز..


واتفقنا بعد المحاضرتين نروح نصلي صلاه ربنا>>عشان لاصار شي ماشيات

ونطلع الساعه12وربع ..ثلاث بنات ..بنتين..بنتين..بنتين..عشان مانثير الشكووك..

ووسيله المواصلات..سواق المهايطيه والعاقله..سبب أختياره..لأنـه مفهي ومايدري وين ربي حاطه..لو قلنا له ودنـا البحرين ماعنده مانع:P

وانحشرنا بالسيـاره حشرررررره بنت أبووهـا..مومهم..المهم رايحين راااايحين..

طبعـا ماقصر السواق..عرفتوا المثل وين أذنك ياجحـا؟..هذا اللي سواه خوينا بالله..

ضيعنـا نص ساعه وحنا كل وحده فوق الثانيه ..وآخرتها طلع جنب الكليه..امححححق على بالنا بعيد وبنسوي أكشن..ورحله..

ولا اشكال البنات في السياره..عابره سبيل تدعي..العاقله مشغله قصيده تسمعنا..والبريئه ..أنواع المعاناه خخخخخخخ

والباقين ززززحف..مايدرون وين ربي حاطهم..!!


وأخيـــــرا..وصلنـا كلولولولولويييييش...


عـاد داخل مـاك وش سوينـا ؟ وش هببنـا؟..وكيف استولينا على المطعم بكبره..؟..

وتهـوور البريئه والضب ومن بعدهم باقي الشله؟..وكيف طلعت أنا مقلووووووووووووووبـه من..؟


كل هذا في حلقه طاش القادمـه..


أنتظرووني على أحر من الجمر..في فضايح بتنكتب هينـا +صووور



*ملحووزه صغننه: كاتشاب ماكانت معنا بهالرحله..لأسباب أمنيه*

مع تحيـات/السـاحره

سي يـاااا

هاي بنات نسينا نقول ان فية شئ روووووووووووووعة لاننسى دفترنا ولا خلاص وانا بصراحة خاطري اكتب شئ عندي لة معنى كبير
انتي لي غنوة وانغام وقصيد وانتي لي البحر لوكنت بحار
كيف القمر يسطع لو شمسة بعيد كان مانعكس ضية ولاهو بنوار
وانتي في حياتي سور وقفل من حديد يخفي وراة سجون وابواب واسوار
استظل بقفاك لو رحتي بعيد واشكي الم وفراق والدمع مدرار
انتي في حياتي حظ وحظي سعيد وهذا هولي راي والناس احرار
منقوووووول:بقلم العاقلة
بس كان يرفع الراس وعاجبني :مهايطية بس دلوووووعة خخخخ

يعجز لساني عن وصف اناس مثلكم بالفعل ولكن لايسعني سوى قول انني بالفعل محظوظة انا محظوظة ومحظوظ كل من عرفكم احبـــــــــــــــــــــــــــــــــــــــــــــكم جميعا

بقلم/ المهايطية انتظرو المزيد

بمناسبة افتتاح هذه الصفحة لتكون كتابا تاريخيا

يخلد ذكرياتنا التي اتمنى ان لاتنتهي بمرور الاياام وأن نكون

دوما عقدا لاينقطع ولو اهتاجته ظروف الحياه

وانا هنا سأخلد لكن ماوصلتن إليه من إنجاز وماحققتموه من امال بهذه الكلمات

لتتصدر ابداعاتي المقبلة

عقد من الحسن أحاط أعناقكن..وطوق من الطموح اعتلى رؤؤسكن...

واكتملت زنيتكن بالحب يملء

أفئدتكم

والصدق يسكن شفاهكن...والاخلاص تنطق به اعينكن..

والصفاء الذي اضاء وجوهكن دفأ

أنتن الان ((حوريااات طاااش))

تحملن قناديل المستقبل

تدخلن من باب متاهة واحدة لتسلك كل واحدة طريقا مختلفا

اذا:فلتحرص الواحدة على ان تقف في المكان المناسب..فتعلق قنديلها وعلى ضوءه تجعل من مكانها روضة تغني

فيها طيور الجنة بأحلى التغاريد فتجعل منه محرابا تصلي فيه صلاة الطهر

فتثبت في مكانها ولتبتعد عن معاول الحاسدين والأعداء تهدم ماحققته

ولتكن

شامخة

في

زمن الإنكسار

بقلم:

العاقلة

==>اعتذر ان خذلني التعبير==> يالربع

كم جميلا لو بقينا اصدقاء...

قلوووب المحبه اجتمعت

وافكارنا المشعه اضاءت المكان

مشاعرنا وأحاسيسنا انتشر شذاها حولنا

أحسست بدفئ المشاعر بروح الاخوه و رباط الصداقه

اخذت الذكريات تجول بخاطري وعيناي في حالة تذكر فضيع تتلالأن فرحا لاجتماعنا مره أخرى

وكان من بعد السبات والهدوء عاصفه تعج بها احلى المواقف

انها السنه الاخيره باذن الله واتمنى ان لا تكون هي اللحظات لاخيره اللتي تربطنا ببعض

فالصداقه لا حدود لهااا وليست مرتبطه بمكان او زمان

وان باعدت بيننا الخطوات فالقلووووب قريبه بالنبضات

أسأل الله ان يديم علينا هذه المحبه وان تزداد يوما بعد يوم
>>>>>>>>>>

بالله عليكم هذا كلام يصلح لطقاقه ههههههههههه
اعترض غيروا اسمي خخخخخخخخخخ
كل الشله كلهم
لافررررق الله شملهم
ويازيني انا بينهم
والطقاقه لا تخلووووووونها

عازمينكم على فوول وتميس .. بالكليه!!

By : 3abrat-sabeel

صباح الفول المدمس والطعميه

هذا اللي يسلمكم ويخليكم

طقت براسنا مره ناكل فوول وتميس بالكليه

يمين .. يسار

مافيييه .. الفكره براسنا ولازم تطبق

تبرعنا انا والساحره والطقاقه بعد مانطلع من البيت الصباح نمر عالفوال اللي جنبنا ونشتري 3 صحون كباار فول

وتمييس .. مدري كم حبه بس كانوا كثييير

لاحظوا ان السالفه ماوقفت على فول

المهايطيه جابت لنا جبن مبشوور ومربى ولبنه

والعاقله والضب جابوا لنا ترمسين مويه حاره

والباقين اللي جابت نسكافيه واللي جابت كاسات واللي جابت سكر واللي جابت زيتون هههههههههه

وكل هذا بالكليه

واتفقنا نجي بيوم مافيه دراسه عالايام الاخيره في الترم ونجي نزط ونبلع ونسولف ونستانس ونرجع بيوتنا

لاااا ومن الحماس عزمنا صديقاتنا من برا الكليه

عشان ياكلون معنا من هالفوووول

ونحتفل بهالمناسبه هع هع

المهم تم الاتفاق

شرينا الفووول .. والله يهديه الفوال كان حاط بصل بالكيسه ههههههههه اعوذ بالله خيسنا بالسياره

رميناه وقعدنا نبخبخ عطر بالسياره عشان الريحه تروووح

ومن فرحتنا بالفوول .. ودنا نوصل الكليه بسرعه قبل مايبرد

(كان وقتها الدنيا بررررررررررد)

يعني حماس الفول جا بوقته

المهم حنا بالطريق ومن زود الحماس .. بنشر كفر السياره !!!!!!

حنا انهرنااا

لاااا .. الفول بيبرد ==>>> هذا همهم خخخخخخخخ

البنات يدقدقون .. يسالون وييييينكم تأخرتوا ==>>> برضووو همهم الفول ههههههههه

الصعايده وصلواا ههههههههه

المهم مرينا ورشه ضبطنا السياره ومشينا

وصلنا

حطينا سفرتنا

وبلعنااااا نواشف على كيف كيفكم

كل من مر عندنا يضحك على نواشفنا

نواشف وبكليه .. وربي ماتجي هههههههههه

المهم بعد ماخلصنا حبينا نوثق هذه اللحظه المهمه بلقطه

الصوره موجوده ببدايه الموضوع

وكل نواشف وانتم بصحه وسمنه مفرطه :p

حديث الورق أثناء السفر .. بقلم العاقلــه

ابت جفوني ان تلتحم سويا..

وكأن بينهما جدال عقيم كلما اقتربت احداهما فرت اختها الأخرى لتكتبان قصة هجر على صفحات السهر بمداد النور .. الذي يتسلل من النافذة

وعليها فقد افترقت الأهداب

التي عادة ماتنسج النسيج الدافئ المخملي في وقت راحتي
هنا دارت في ذهني .. (معارك) طاحنة

تأخذ صولات من الهزيمة .. تلحقها تباعا جولات نصر

وبين الهزيمة و النصر..

ينمو الصلح عل الأمر ان ينتهي بسلام دون خسائر الأرق التي تسجلها تلك المعارك

كثيرا مايقضي النصر على الهزيمة

لو أتينا بمقتضيات النصر الحقيقة دون تكلف أو نقص .. حيث يستحيل ان تلحق الهزيمة بالنصر

اذا كان يملك تلك المسببات

.

.

.
أسامر نجوم العلياء .. التي برزت عندما اختفت انوار المدينة

التي قد اخفتها ببريقها المختال .. زيفا لمدة طويلة

ولكن دائما ماتكون الأشياء الحقيقية في أوج الروعة

يختالها صمت مطبق يسلب لبك دونما قصد

بعكس الأشياء المزيفة التي كل شيئ فيها ينطق.. ويستحثك للقرب منه

وكلما دعتك.. كلما نفرت منها ..

وأخيرا

توصلت أن الحقيقة: معنى لامع بريقه لاينطفى وان غطاه غبار الأيام

صامد لأنه يلبس ترس الصدق ويحمل سيف الواقع

فيبقى غالي الثمن لأن معدنه فولاذي لا يباع بالبخس القليل

وأن الناس مهما تهافتو على الزيف والخيال الجديد الذي يغريهم برونقه يأتي لهم يوم يستيقظون من غفلتهم فيلفظون طعم الكذب الذي ظنوه عسلا ليتسابقو إلى لذة الحقيقة

تبتسم الحقيقة حينها ليظهر ذلك اللون الفضي الساحر الذي أخفته أيام المكر على ايدي اولئك المغفلين

لتلف الناس بسندس متلألأ محاولة ان تحميهم من اعاصير الحياة التي تقتحمهم

انتهى30-7-1428

خطـاب الإفتـتــــــــــاح..

صبــــــاح الورد عليـكم..

معكم الساحـره تتكلم من قلب الحدث

تعجز الكلمـات بعد ان أصبح الحلم حقيقه..وصار لنا بلوق زي العـالم نقدر نتكلم فيه ونوووسـع صدورنـا ونسجل أحـلى

الذكريات فيه..

طبعا كل هذا من فضل ربي ثم فضل الغـاليه عابره سبيل ملح الشله ياحبني لتس يالدووبه

في هالبلوق بتلقون مواقف منها اللي يضحك واللي يبكي>>مصدقه انها تلقي خطاب الأفتتاح:d

وانا كل شوي بجيكم بشوشتي وعصاتي السحريه.. القي عليكم كلماتي الذهبيـه..

انتظرووونـا..

البدايه

الله يمسي ويصبح الجمييع على خيير
اول شي كل عاام وانتم بخير بمناسبه رمضان
والله يعيده علينا وعليكم بصحه وعافيه

تبون تعرفون مين احنا؟
احنا 10 بنات .. جمعنا ربي في الكليه وصرنا بالحيل قراب
مرينا بمواقف روووعه .. ضحكنا .. لعبنا .. غامرنا
احلى مافينا .. ان قلوبنا على بعض (( اذكروا الله

وهالبلوق لنا ولكم
لنا نجمع فيه احلى الذكريات
ولكم عشان تقرون مواقفنا المجنوونه والهبال اللي نسويه

والحين بعرفكم علينا وحده وحده
1- باقيرا
2- الساحره
3- المفهيه
4- البريئه
5- الطقاقه
6- العاقله
7- عابره سبيل
8- كتشب
9- المهايطيه
10- الضب

ههههههههههههههه
بقولكم ليه كل وحده عطيناها هاللقب

باقيرا
هالبنت تموووت باللون الاسود .. بلايزها سودا .. تنورتها (حتى واحنا ممنوع علينا نلبس تنوره سودا ) لوونها اسود
واحيانا نسميها - رجاحه العقل - لانها ماشاء الله حكيمه .. وتخطط لبعيد
نعتمد عليها كثير .. خصوصا بالمواقف الخطره
حبوووبه .. قلبها عكس هاللون اللي معلقه عليها خخخخخخخخ
واكيد تعرفون منهو باقيرا
هذا النمر اللي مع ماوكلي ههههههههههههههههههه

الساحره
لانها ماشاء الله .. محبووبه الجميع .. وكانها ساحره البنات عشان يحبونها ويتعلقون فيها
هي صحيح ساحره .. لسانها وعقلها الحكيم هم اللي سحروا الناس لها
مشهووره بمناكيرها الملونه .. مدري ليه اذا حطت مناكير تتغير نفسيتها وتصير رواااااااااق
اذا عصبت ههههههههههههه يقوم الضحك
اول مره اشوف انسان اذا عصب يطلع شكله خطييير
البريئه دايم تنشب لها وتعصبهااا وحنا انواع الضحك ==>>> امحق بريئه خخخخخخخخ

المفهيه
عااااالم ثاااااني
داايم مفهيه وفاصله الخدمه
ياكثر ماتضحكنا من فهاوتها
احلى موقف نسويه فيها لما نقول لها حنا بالمكان الفلاني تجي تدووور تدووور تدووووور وحنا قداااامهاااا .. مانعلمها .. نقعد نطالع فيها ونضحك وهي تدووووووووور وماتشوووفنا من الفهياان الزايد .. لييييييين عاد بالاخير تنتبه وتقول الله ياخذ بليسكم يالشيوووووووون وحنا ضحككك عليها

الطقاقه
معها انوااااااااع الطرب
صوتها يجنننن .. دايم تغني لنا وتوسع صدورنا
واحيانا تجيها حالات وترقص بمحاضرات الشبكه
عليها تأليف اغاني موب صااااحي .. كل موقف له اغنيه هههههههههه
راعيه جووو وفله وحماااس

كتشب
هالبنت تصرعنااااااا بتسالي كتشب
تموووووووووت عليييه
كل ماراحت الكافتيريا شرت من هالتسالي وجابته عند خشومنا
نذله تعرف اننا مانحبه تقوم تجيبه
واحيانا تتهور وتدخله معها المحاضره
الله لايوريكم بسسسسسسسس ههههههههههههههههه
وياليت وقفت عالشيبس .. لما نشتري سندويشات اهم شي عندها تدهنا بكتشب .. حتى لو مافيه مستعده تروح الكافتيريا الثانيه بالحرررر وتجيب كتشب

الضب
ههههههههههههه مزاااااااااااج
كل شي تعافه
وكل شي ماتحبه
طبق الاصل عن الضب بخيسه النفسسسس هههههههههه
اذا كنا نسولف بشي عااادي تعالووو شوفو ملامح الوجه انوااااااع القرف
الشي العادي عندنا بالنسبه لها مقررررف

عابره سبيل

هالبنت مايحلى لها تصير مشاغبه وتسولف وتضحك الا في محاضره العملي

ومعيده هذه الماده ماتقول لها شي ولا تهاوشها

وهي انبسطت عالسالفه وكل ماجات هالمحاضره يقوووم الضحك عند هالبنت والشلله معهااا

طبعا اكيد تبون تعرفون وش الرابط بين الاسم وبين سالفه محاضره العملي

الله يسلمكم معيده العملي هذي عندها ايميل

وايميلها مسميته (عابره سبيل) ههههههه ولان خويتنا الحلوه هذي دايم تضحك بمحاضراتها مشى عليها اسم عابره سبيل زي ايميل هالمعيده خخخخخخخخخخخخ

العاقله

اسم على مسمى

عااااااقله وشغابتها تجي من تحت لتحت

موب علانيه زي باقي البنات

راكده وشاطره ماشاء الله

يعتمدون عليها بنات الشله باشياء كثييييييره

مايستغني عنها ابد

هي اللي تمشي امورنا

تعاملها حلوو مع الباقين ولسانها احلى

==> وهذا سر عقلهااا

شاعره قد هالدنيا .. ماشاء الله

انتظروا اشعارها .. بنحطها بهالبلوق ان شاء الله

البريئه

البراءه تقطر منها..الضب دايما تكشر مخالبها عليها..مثلا..لبسك اليوم مو حلو..شعرك عدليه ..ليه ماحطيتي مكياج..انواع التحطيم ودايما تصدق..
نظرتها تفاؤليه لأقصى درجه..كل شي عندها سهل ومو مشكله ..تعتبر جميع الناس طيبين مثلها ..
فيها نسبه فهاوه بسيطه..بحكم ان لوكرها جنب لوكر المفهيه..>>العدوى انتقلتخخخخ

وسميناها بهالاسم لانها مره ارسلت لنا صورتها وهي صغيره بالجوال ..حطت العنوان البريئه..وبسسسس جابتها..

المهايطيه

اووووه هالبنت ماترتاح وتروح مدرجها الا وهي ممتره الصاله رايحه جايه..تسلم على ذي وتقز ذي..وتفرفر بكل الأقسام وغالبا ماتحضر متأخره بحكم هالعاده
ماتحب تقعد ابددد..مسببه ازمه للشله الكسوله اللي يحبون القعده بمكان بارد هادئ وفيه بلعه..
تحب طلعااات البران و(المهايط)..وهذا هو سبب التسميه..
واذا تبي تونسها قولها واحد من هالشيئين: 1) خلطه شعر او بشره او حتى اكل 2) خبر طاااااااازه من الصاله..
* غالبا ماتفرفر برفقه الضب..ويتم توصيتهم ب10 ايس كريم احمر (روج)>>ضريبه الدجـه..

وبعد ماتعرفتوا عالشله

وعرفتوا القابهم

ان شاء الله بنزودكم بالمواقف والاحداث والسوالف اللي تصير معنا

وان شاء الله تحبونا وتتابعونا دوووم